Logo Home SAC JS SF
2022:JanuarFebruarMärzAprilMaiJuniJuliAugustSeptemberOktoberNovemberDezemberArchiv:Fotos + BerichteDeine Fotos übermitteln:Foto-Upload

Skitour Albristhubel
G-Tour, 06. Februar 2022

Bizyte isch e Gruppe vo 15 SAC-ler underwägs ds Simmetal z düruf. Oberhalb vo Matte bim grosse Parkplatz mache mer üs zwäg füre Ufstiig. Ds Wätter gseht besser us als vorusgseit isch gsy.
Am 8.50h starte mer verteilt uf 3 Gruppe mit Fritz, Robert u Hans als Leiter. Nume e churze Bitz müesse mer d Schii ds Strässli uf trage, när chönne mer se aalege. Zersch geits es Stück am Färmelbach nah bim zum Punkt 1214 u de ufem Fahrwäg bis i Färmelbode. Dr Fritz findet immer e chli Schnee zum ufeloufe, grad viil hets nid. Mir frage üs scho, wie dass mer de über die vile Grasmutte wider abechöme. Bir erschte Pouse chönne mer chli dr Blick i ds Simmetal gniesse. Es het afe chli Gschlirgg am Himel, vom aagseite Sturm merkt me no nüt, aber dr Fritz wott nid z lang blibe hocke u ds schöne Wätter no usnütze. Wyter geits über Weide ufe u wider es chlys Stück am Strässli nah bis zur Blosseggmad. Es het iz o dütlech meh Schnee. Über di stotzigi Blossegg tüe vili d Harschyse druf, d Spur isch mängisch chli veryyschet. Übere breit Rügge uf, dr Gipfel gseht me scho, macht sech der Luft bemerkbar, es früschet zimli uf.
Am halbi eis nach 1065 Höhemeter Ufstiig symer alli underem Gipfel aacho. Iz chuttets üs zünftig u chalt um d Ohre u es gluschtet niemer, hie ds Zmittag uszpacke. Hurti d Fäll abnäh, e Blick über d Kreete wärfe, teil gö no ganz ufe, u 20 Minute später symer für d Abfahrt parat.
Dr Fritz findet wunderschöni Häng zum abefahre, o ds fyyne Pülferli uf der gfrornige Schneedechi isch nid z verachte. Hie u dert ghört me öper Jutze vor Fröid. Bir Hütte uf der Bruchweideni mache mer e gmüetlechi Mittagspouse ar Hilbi.
Ringsetum wird dr Himel iz glych chli fyyschterer, mir näme no der Räschte vom Abstiig i Aagriff. Under der Hälige gömer e Momänt z Fuess wyter bis mer bim Punkt 1426 wider Richtig Eggeweideni ar Ufstiigsspur nah chönne abefahre. Ersch iz gseh mer di speziell gschichtete Felse mit de vile Yyschzäpfe drann – wunderschön. Am halbi drü symer alli wider gsund u munter bim Parkplatz u chönne id Outo yylade.
Im Restorang Diana lösche mer no dr Durscht u rächne ab. Gly druf bräche mer uf gäg ds Underland. Mir chönne zrügg luege ufene schöni, abwächsligsryychi Tuur. Mersi vilmal Fritz, Robert u Hans für dä schön Tag, mir heis alli gnosse.
Theres (im Name vo Hansruedi, Lisa, Ueli, Hansueli, Dora, Kurt, Rosmarie, Stefan, Annemarie, Ruedi u Urs)


© SAC Sektion Grosshöchstetten 1999 - 2021: 22 Jahre!